Thursday, February 14, 2008

Wun ë Tiɛɛl acie Mac ku Pan Cïnic Bɛ̈ny ee riääk aköl

Wun ë Tiɛɛl acie Mac ku Pan Cïnic Bɛ̈ny ee riääk aköl

Jɔlku muɔ̈l teer
Ku yeku röt nhiaar
Acïn raan ben Muɔnyjäŋ nhiaar
Ee Muɔnyjäŋ yen acï ya anyaar
Yen ajɔl wuɔ̈ɔ̈t thäär.

Ariɔ̈ny kiith wäär cï thiaan
Kek aa jam ka bï Muɔnyjäŋ tiaam
Ku këden acä ye bɛ̈ɛ̈r
Ɣok aa kɔc thiääk
Aköl le ɣɛn rɔ̈m ke keek
Aabï dhiau arak thiäär
Rin ɣɛn ee moc arak thiäär.

Ee raan dhɛ̈l ɣa yen acä ye ŋuään
Ku yen aye cuɔ̈p teer
Ku na cɔk kë ɣa keer
Ke ɣɛn acï kɛt keek.
Thɔndït ee nöök të piiny,
Ɣɛn ee Muɔnyjäŋ.
Ɣɛn ee Muɔnyjäŋ.

Jɔlku muɔ̈l teer
Ku yeku röt theek
Rin puɔ̈n cïnic teer
Yen abï Nhialic ɣok thiee
Ku yen abï Nhialic ɣok röt kueeŋ
Ku yen abï ɣok röt deer.

Na cuk röt ë theek
Ka alei ee ɣo wïc yiic
Ë raan cuai bï keeth
Ku rum käkua bï pïïr ë keek
Ku benku ya dhiau ɣok aacï alei peec
Ku ke tiɛldan cï ɣok ë mat
Yen acï alei ɣok ë theek.

Duɔ̈kkë ye mïth ë röt
Acï kɔc ë leec
Ku ee yï mac theer
Ku acïn Muɔnyjäŋ ye mac theer
Diët Muɔnyjäŋ acie baai keer
Aa mïïth kek acï ɣok yiëk teer
Ku yen acï alei ɣok ë theek
Ku rum käkua bï pïïr ë keek
Ku benku ya dhiau ɣok aacï alei peec
Ku ke tiɛldan cï ɣok ë mat
Yen acï alei ɣok ë theek.

Jɔlku muɔ̈l teer
Alei acï ɣok leel
Buk yanhde ya theek
Ku cuk yäthkua ye theek
Ku na cɔkku yanhden theek
Ka ŋuɔt cïk gam buk nhïïm thöŋ ke keek
Rin alei, ku cɔk yiëk moor
Ka cï yï kɔŋ leec.

Matku ɣo yiic
Matku ɣo yiic
Ku yeku röt deet
Ëtë bï ɣok piir thïn ke keek
Ee ciɛɛŋda ku yanhda
Yen atëërku ke keek
Ku acä bï päl keek
Abul lueel ɣo keek.
Nhialic yekë muk kethook
Ku aliu kepuöth, acuk bï kaŋ mat ɣo keek.

Acïn ciɛɛŋ wär ciɛɛŋ Muɔnyjäŋ
Acïn yanh wär yanh Muɔnyjäŋ
Yanhdan yeku theek
Acïnic teer, ku aye ɣok koc theek
Rin yath acï kɔc ye teet.

Jɔ̈ɔ̈l wäär nyuuc wädït
Aacä ye teet.
Të cɔk kek ɣa luöi ruëëny
Ka cä ye dhuk nhom keek
Rin jäl aye wut theek
Yen aye ɣɛn keek theek
Na cïk röt ye theek
Ke aköl le ɣɛn ye gäm keek
piny abï ɣo dak ɣo keek.

Lueth ku ruëëny ku luɔɔm ku
Jëijëi wël acie käkiɛ̈.
Aa lueth kek acä kɛ̈ɛ̈k ke keek.
Acä gam bï manhdiɛ̈ piɔ̈ɔ̈c keek.
Na le mïth cie ciɛɛŋden ye theek,
Ku gamkë bï alei keek piɔ̈ɔ̈c lueth
Ku ruëëny ku jëijëi wël,
Ku aa lueth kek acä kɛ̈ɛ̈k ke keek,
Ka ŋuɛ̈ɛ̈n bïk röt mät keek.
Lueth ku ruëëny acie käkiɛ̈
Aa keek aŋïc keek
Acä gam bï manhdiɛ̈ piɔ̈ɔ̈c keek
Baai acuk kuɔ̈c cieŋ ɣo keek
Aŋuɛ̈ɛ̈n buk puɔ̈k ɣo keek.

Ee luɔɔi de Muɔrwël Ater Muɔrwël